ပြည် ပမှ ပြန်လာသူများ၊ ရောဂါဖြစ်ပွားရာ နေရာဒေသများမှ ပြန်လည်ရောက်ရှိလာကြသူများအနေဖြင့် မိသားစုနှင့် ၁၄ ရက်တာ မခွဲနိုင်လျှင် တစ်သက်တာ ခွဲခွာရလိမ့်မည်ဟု ကျန်းမာရေးဝန်ကြီးဒေါက်တာမြင့်ထွေးက သတိပေးပြောဆိုလိုက်သည်။

ကျန်းမာရေးနှင့်အားကစားဝန်ကြီးဌာန၊ ပြည်ထောင်စုဝန်ကြီး ဒေါက်တာမြင့်ထွေးက ယနေ့၊ နံနက်တွင် နေပြည်တော်၌ ကျင်းပသော COVID-19 ရောဂါကာကွယ်ထိန်းချုပ်ရေး ဗဟိုအဆင့် လုပ်ငန်းညှိနှိုင်း အစည်းအဝေးတွင် ထိုကဲ့သို့ ပြောဆိုလိုက်ခြင်းဖြစ်သည်။

ရောဂါဖြစ်ပွားရာနေရာဒေသများမှ ပြန်လည်ရောက်ရှိလာကြသူများအနေဖြင့် (၁၄) ရက်တာကာလ အသွားအလာကန့်သတ်ခြင်းကို လူ့ကျင့်ဝတ်အရ မဖြစ်မနေ လိုက်နာဆောင်ရွက်ရမည်ဖြစ်ပါကြောင်း၊ အသွားအလာကန့်သတ်ခြင်း ခံယူသူများအနေဖြင့် မိမိ၏မိသားစုနှင့် လတ်တလောကာလမှာ (၁၄) ရက်တာ ခွဲခွာနေရခြင်းကို သည်းမခံနိုင်ပါက ရောဂါဖြစ်ပွားမှုရှိလာနိုင်ပြီး တစ်သက်လုံးခွဲခွာ နေရသည့် အဖြစ်မျိုးကိုပင် ကြုံတွေ့ရနိုင်ပါကြောင်း ဝန်ကြီးက ပြောဆိုသည်။

COVID-19 ရောဂါကာကွယ်ထိန်းချုပ်ရေးနှင့် တုံ့ပြန်ဆောင်ရွက်ရေးလုပ်ငန်း လုပ်ဆောင်နိုင်ရာတွင် သတင်းအချက်အလက်များကို အချိန်နှင့်တပြေးညီ အားလုံးသိရှိနိုင်ရန်နှင့် ပိုမိုထိရောက်စွာ ချိတ်ဆက်ဆောင်ရွက်နိုင်စေရေးအတွက် ဝန်ကြီးဌာနမှ အဆင့်မြင့်အရာရှိများဖြင့် ဖွဲ့စည်းထားသော COVID-19 Email Group တွင် တိုင်းဒေသကြီး/ ပြည်နယ် အစိုးရ အဖွဲ့ဝန်ကြီးချုပ်များ၊ လူမှုရေးဝန်ကြီးများကိုလည်း ထပ်မံထည့်သွင်း၍ အသိပေးဆောင်ရွက် လျက်ရှိပါကြောင်း၊

COVID-19 ရောဂါကာကွယ်ရေးနည်းလမ်းများကို မြန်မာနိုင်ငံပြည်သူများအားလုံးထံ ကျယ်ပြန့်စွာရောက်ရှိစေရေးအတွက် အဓိအကျဆုံး ကျန်းမာရေးအသိပညာအချက်အလက်များကို ကျန်းမာရေးအသိပညာများ ကျယ်ကျယ်ပြန့်ပြန့်ရောက်ရှိစေရေးအတွက် လက်ကိုင်အသံချဲ့စက် (hand-held speaker) များ၊ အသံချဲ့စက် (loud speaker) များအသုံးပြု၍ သင့်တော်ရာယာဉ်များဖြင့် ရပ်ကွက်၊ ကျေးရွာများတွင် လှည့်လည် ဖြန့်ဝေသွားရမည်ဖြစ်ပါကြောင်း၊ ထိုသို့ဆောင်ရွက်နိုင်ရန်အတွက် ကျန်းမာရေးအသိပေးနှိုးဆော်စာ (health message) များကိုလည်း ပြုစုထားရှိပြီးဖြစ်ပါကြောင်း ၎င်းက ဆိုသည်။

ထိုင်းနိုင်ငံတွင် အလုပ်သွားရောက်လုပ်ကိုင်သည့် မြန်မာနိုင်ငံသားများ ပြန်လည် ရောက်ရှိလာသူ များကို ပြည်သူလူထု၏ ဝိုင်းဝန်းပူးပေါင်း ကူညီစောင့်ရှောက်ပေးမှုဖြင့် သတ်မှတ်နေရာ အဆောက်အဦများတွင်ထားရှိပြီး အသွားအလာကန့်သတ်ခြင်း အစီအစဉ် (Community based facility quarantine) ဖြင့် ရောဂါစောင့်ကြပ် ကြည့်ရှုခြင်းနှင့် ကာကွယ်ထိန်းချုပ်ခြင်း လုပ်ငန်း များကို ဆောင်ရွက်တော့မည်ဖြစ်ကြောင်း၊

ထိုသို့ဆောင်ရွက်ရာတွင် ၎င်းတို့ မြန်မာနိုင်ငံအတွင်း ပြန်လည်နေထိုင်မည့် နေရပ် လိပ်စာ အတိအကျကိုရယူကာ အသွားအလာ ကန့်သတ်ကာ နေထိုင်စေမည့်နေရာပြ မြေပုံ (Quarantine Mapping) များရေးဆွဲထားရှိပြီး သက်ဆိုင်ရာဌာနများနှင့် ပူးပေါင်းချိတ်ဆက်ဆောင်ရွက်သွားမည်ဖြစ်ပါကြောင်း ၀န်ကြီးက ထုတ်ပြန်ပြောဆိုသည်။

MOHS – Khit Thit Media