အေ သာကမင်းကြီး၏ နောက်ဆုံးဆုတောင်း

အသောကမင်းကြီးဟာ အလွန်အားနည်းစွာနဲ့ ညောင်စောင်းပေါ်မှာ လဲလျောင်းနေပါတယ်။

ယခင်က … အကြော ပြိုင်းပြိုင်းထပြီး သန်မာတောင့်တင်းကာ ကြွက်သားတွေဖောင်းဖုနေခဲ့တဲ့ လက်မောင်းကို ခုတော့ ကိုယ်တိုင် အနိုင်နိုင်မနေရတဲ့ အနေအထားရောက်နေပြီ။

“အရှင်မင်းကြီး”

“အေး… ဘယ်သူများလဲ”

“အမတ်ကြီး ရာဓာဂုတ္တပါဘုရား”

အမှန်တော့ .. အသောက မမြင်တော့ဘူး။ အမြင်တွေမှုန်ဝါးပြီး ဘယ်သူ မှန်းတောင် မသိပါဘူး။

“မင်းကြီး … မင်းကြီးရဲ့ ဆီးဖြူသီးတစ်ခြမ်းကို သံဃာတော်တွေက စေတီ တစ်ဆူတည်ဖို့ ဆုံးဖြတ် လိုက်ကြပါတယ်ဘုရား”

“သာဓု… သာဓု… သာဓု”

အသောကရဲ့ လေသံက အရမ်းကို တိုးလွန်းလှတယ်

“ရာဓာဂုတ်တ”

“ခစားလျက်ရှိကြောင်းပါဘုရား”

“ငါ့ရဲ့ နောက်ဆုံးအချိန် နီးလာပြီ”

“ဗုဒ္ဓကို နှလုံးသားထဲမှာ သွင်းထားလိုက်ပါဘုရား”…

“ငါ့နှလုံးသားထဲမှာ ဗုဒ္ဓကအမြဲရှိတယ်”

“အမတ်ကြီး”…

“ဘုရား”

“ဟောဒီ ဇမ္ဗူဒိပ်မြေပြင်တစ်ဝန်းကို မည်သူပိုင်သနည်း”….

“အရှင်မင်းကြီးပိုင်ပါတယ်”

“ကောင်းပေစွ …။ ငါ့ဆီမှာ လှူစရာ ဘာမှ မကျန်တော့ဘူး။ ငါ ဒီမြေကို တကယ်ပိုင်သေးလား”

“ပိုင်ပါသေးတယ်ဘုရား”…

“ဒါဆိုရင် .. သံဃာတော်တွေရှိရာ ကျောင်းတော်ဘက် ငါ့ကိုယ်ကို စောင်းပေးပါလား”

အမတ်ကြီး ရာဓာဂုတ္တက မင်းကြီးကို …. တစ်ဘက်စောင်းပေးလိုက်ချိန် မှာ မင်းကြီးက လက်အုပ်ချီလိုက်ပြီး ..

“တပည့်တော်သည် တပည့်တော်ပိုင်ဆိုင်သည့် ဇမ္ဗူဒိပ်မြေပြင် အားလုံးကို သံဃာတော် အရှင်မြတ်တို့အား လှူဒါန်းပါသည်ဘုရား”

အားလုံးသော မင်းမှူးမတ်အပေါင်းက သာဓုသုံးကြိမ်ခေါ်ကြတယ်။

အသောကမင်းကြီးရဲ့ နောက်ဆုံး ဆုတောင်းဟာ အလွန်ကြည်ညို ဖွယ်ကောင်းတဲ့ ဆုတောင်းပါ။

“ဘုရားတပည့်တော်သည် ဤသို့ လှူဒါန်းရသည့် ကောင်းမှုကံ စေတနာတို့ကြောင့် နတ်ပြည်သို့လည်း မရောက်လိုပါ ဗြဟ္မာ့ပြည်ကိုလည်း မရောက်လိုပါ

မင်းစည်းစိမ်ကိုလည်းမခံစား လိုပါ မင်းစည်းစိမ်ဆိုသည်မှာ .. ရေပွက်ပမာ ခဏတာမျှဆိုတာ သိပါပြီဘုရား ..”

“တပည့်တော်သည် လှူဒါန်းရသော ကုသိုလ်ကောင်းမှု စေတနာကံကြောင့် အရိယာသံဃာများ တန်ဖိုးထားကြသည့် မိမိစိတ်ကို မိမိ ထိန်းချုပ်နိုင်သောပုဂ္ဂိုလ် ဘဝဆက်တိုင်း ဖြစ်ရပါ လို၏ဘုရား”..

မင်းကြီးဟာ … ဒီဆုကိုတောင်းပြီးတော့ နောက်ဆုံးထွက်သက်ကိုချကာ ဇီဝိန်ချုပ်ငြိမ်းသွားပါတော့တယ်။

အသောကရဲ့ နောက်ဆုံးဆုတောင်းဟာ

“ကိုယ့်စိတ်ကိုကိုယ် ထိန်းချုပ်နိုင်တဲ့ ပုဂ္ဂိုလ်ဖြစ်ပါရစေ” တဲ့ …။

လောကမှာ … ဘာအရေးကြီးသလဲ

သွဇာလား ?

အာဏှာလား ?

စည်းစိမ်လား ?

တန်ခိုးလား ?

ဂုဏ်လား ?

ငွေလား ?

ရာထူးလား ?

ဗုဒ္ဓဘာသာဝင်များ စဉ်းစားပါ။

သီတဂူဆရာတော်ကြီး

Credit